लॉयड्स इन्फिनाइट फाऊंडेशन मार्फत आयोजित शेतकरी अभ्यास व प्रशिक्षण दौरा कृषी संशोधन केंद्र, एकार्जुना येथे संपन्न
लॉयड्स इन्फिनाइट फाउंडेशनच्या वतीने भाजीपाला उत्पादक शेतकऱ्यांसाठी भाजीपाला लागवड, पिकांची फेरबदल व संलग्न कृषी उपक्रमांवरील प्रशिक्षण व अभ्यास दौरा दि. १८ डिसेंबर २०२५ रोजी डॉ. पंजाबराव देशमुख कृषी विद्यापीठ, अकोला अंतर्गत कृषी संशोधन केंद्र, एकार्जुना येथे यशस्वीरित्या पार पडला. या प्रशिक्षण व अभ्यास दौऱ्यात घुगूस परिसरातील पाढरकवडा, वढा, धानोरा, शेनगाव, म्हातारदेवी, उसगाव, पिंपरी, बेलसणी व मुरसा या नऊ गावांतील ३० हून अधिक भाजीपाला उत्पादक शेतकरी सहभागी झाले होते. या उपक्रमाचा मुख्य उद्देश शेतकऱ्यांना वैज्ञानिक भाजीपाला लागवड पद्धती, पीक फेरबदलाचे महत्त्व, संशोधनाधारित तंत्रज्ञान तसेच प्रत्यक्ष प्रात्यक्षिक शेतांद्वारे मार्गदर्शन देणे हा होता. यामुळे शेतकऱ्यांची निर्णयक्षमता वाढून उत्पादनात वाढ व आर्थिक स्थैर्य साध्य होण्यास मदत होणार आहे.
कार्यक्रमात डॉ. श्रीकांत अमरसेट्टीवार (सहसंचालक संशोधन, डॉ. पीडीकेव्ही अकोला व विभागप्रमुख, कृषी संशोधन केंद्र, एकार्जुना) यांनी पीक फेरबदल व भाजीपाला लागवडीचे महत्त्व विशद केले. डॉ. सचिन शिंदे (तेलबिया पिक तज्ज्ञ, डॉ. पीडीकेव्ही अकोला) यांनी कापूस व सोयाबीन ऐवजी तेलबिया पिकांकडे वळण्याचे आर्थिक व कृषी फायदे शेतकऱ्यांना समजावून सांगितले. तसेच डॉ. राऊत यांनी संशोधन केंद्रातील जिवंत प्रात्यक्षिक शेतांवर पीक व्यवस्थापन व आधुनिक तंत्रज्ञानाची माहिती दिली. यावेळी प्रगतशील शेतकरी श्री. शिरसागर यांनी रेशीम उद्योग विषयक अनुभव कथन करून पूरक उत्पन्नाच्या संधी स्पष्ट केल्या, तर दुसऱ्या प्रगतशील शेतकऱ्यांनी मधमाशी पालनाद्वारे परागीभवन होऊन उत्पादन व गुणवत्तेत होणारी वाढ याबाबत मार्गदर्शन केले.
या कार्यक्रमासाठी लॉयड्स इन्फिनाइट फाउंडेशनचे व्यवस्थापक डॉ. आदित्य कदम, वरिष्ठ अधिकारी डॉ. महेंद्र वैरागडे तसेच गजानन बोबडे व आदित्य मोहितकर हे उपस्थित होते. त्यांनी शेतकऱ्यांशी संवाद साधत अशा उपक्रमांमधून शाश्वत शेती व शेतकऱ्यांचे जीवनमान उंचावण्यासाठी फाउंडेशन कटिबद्ध असल्याचे सांगितले. हा प्रशिक्षण व अभ्यास दौरा शेतकऱ्यांसाठी अत्यंत उपयुक्त ठरला असून, भविष्यात अशा उपक्रमांमुळे शाश्वत शेती, उत्पन्नवाढ व ग्रामीण आर्थिक विकासाला चालना मिळेल, असा विश्वास व्यक्त करण्यात आला.
