गडचिरोलीत फर्निचरच्या जुन्या वादातून हादरवणारी घटना ; डोळ्यांत मिरचीची पूड फेकून तरुणाचा धारदार शस्त्राने अंत
गडचिरोली, सुखसागर झाडे :-शहरात नुकतीच एक अत्यंत धक्कादायक आणि दुर्दैवी घटना उघडकीस आली आहे. येथील लांझेडा वॉर्डात सोमवारी दुपारी ४ वाजताच्या सुमारास फर्निचरच्या जुन्या वादातून एका तरुणावर जीवघेणा हल्ला करण्यात आला असून त्यात त्याचा जागीच मृत्यू झाला आहे. गेल्या पाच-सहा वर्षांपासून प्रलंबित असलेल्या एका आर्थिक व्यवहारातून हा वाद उफाळून आला होता.
मयत तरुणाचे नाव सचिन रामचंद्र कोलूरवार असून त्याचे वय ३५ वर्षे होते. तो मूळचा विवेकानंद नगर येथील रहिवासी होता. तर, या घटनेतील मुख्य आरोपीचे नाव महेश महादेव बुरांडे (वय ३४ वर्षे) असे असून तो लांझेडा वॉर्ड येथे वास्तव्यास आहे. मिळालेल्या माहितीनुसार, पुण्यात कार्यरत असलेल्या एका पोलीस अधिकाऱ्याने कोरोना काळात आरोपी महेश बुरांडे याला सागवानी फर्निचर बनवण्यासाठी तब्बल २ लाख रुपये दिले होते. मात्र, या गोष्टीला ५ वर्षे उलटून गेल्यानंतरही महेशने अद्याप ते फर्निचर बनवून दिले नव्हते.
याच रखडलेल्या फर्निचरच्या व्यवहारावर तोडगा काढण्यासाठी आणि मध्यस्थी करण्यासाठी सचिन कोलूरवार हा आपल्या एका मित्रासोबत सोमवारी दुपारी महेशच्या घरी पोहोचला होता. तिथे गेल्यावर फर्निचरचे काम अजूनही अपूर्णच असल्याचे त्यांच्या निदर्शनास आले. यावरून सचिन आणि महेश यांच्यात शाब्दिक चकमक उडाली आणि जोरदार बाचाबाची झाली. या वादादरम्यान आरोपी महेशचा राग अनावर झाला आणि त्याने अचानक घरातील मिरचीचे तिखट थेट सचिनच्या डोळ्यांत भिरकावली.
मिरचीच्या तिखटामुळे डोळ्यांची असह्य जळजळ होऊ लागल्याने सचिन स्वतःचा बचाव करण्याच्या स्थितीत राहिला नाही. हीच संधी साधून महेशने फर्निचर बनवण्यासाठी वापरल्या जाणाऱ्या ‘वाकस’ नावाच्या धारदार शस्त्राने सचिनच्या छातीवर सलग आणि गंभीर वार केले. या भयंकर हल्ल्यात रक्ताच्या थारोळ्यात कोसळलेल्या सचिनने काही क्षणांतच आपले प्राण गमावले आणि त्याचा जागीच मृत्यू झाला.
या घटनेची माहिती मिळताच पोलिसांनी तातडीने कारवाई करत आरोपी महेश महादेव बुरांडे याच्या विरोधात हत्येचा गुन्हा दाखल केला आहे. सध्या हा आरोपी फरार असून पोलीस त्याचा सर्वत्र कसून शोध घेत आहेत. एका जुन्या वादाने इतके भयानक वळण घेतल्याने संपूर्ण परिसरात भीतीचे वातावरण पसरले आहे.
