गडचिरोली मुख्य मार्गावर महिला शिक्षकेचा अपघाती मृत्यू
अपघातात महिला शिक्षकेचा मदतीचा हात मिळविण्यासाठी केविलवाणा प्रयत्न
गडचिरोली, दि. 10 : शहरातील चंद्रपूर मार्गावर आज सकाळी घडलेल्या भीषण अपघातात महिलेचा मृत्यू झाला. बी फॅशन प्लाझा समोर मालवाहक ट्रक रिव्हर्स घेत असताना त्यांच्या दुचाकीचा तोल सुटल्याने त्या खाली कोसळल्याने त्यांना गंभीर दुखापतीत सुद्धा बघणाऱ्या कडून मदतीचा हात पुढे येईल या करीता केविलवाणी तळमळ परंतु शहरी नागरीकांमध्ये आपुलकीची भावना, दया हि कुठे तरी लुप्त झाल्याचे चित्र घटना स्थळावर घेण्यात आलेल्या चित्रफिती मध्ये दिसून येते. अपघात एवढा भयावह होता की, डोक्यातुन प्रचंड रक्तस्राव झाल्याने जिल्हा सामान्य रुग्णालयात दाखल केल्यानंतर डॉक्टरांनी त्यांना मृत घोषित केले.
ममता बांबोळे असे त्या महिलेचे नाव असून त्या कार्मेल स्कूलमध्ये शिक्षिका म्हणून कार्यरत होत्या.
त्या मूळच्या पोर्ला येथील असून त्या कॉम्प्लेक्स येथे आपल्या आईकडे राहत होत्या अशी माहिती आहे.
अतिक्रमण व पार्किंगचा गंभीर प्रश्न ऐरणीवर…
या मुख्य मार्गावर दिवसभर वाहनांची वर्दळ असते. त्यातच मार्गालगत असलेल्या अनेक दुकानांनी रस्ताच गिळंकृत केल्याचे चित्र असून, दुकानासमोर पार्किंग नसल्याने वाहनधारक थेट रस्त्यातच वाहने उभी करतात. काही दुकानांचे सामानही थेट रस्त्यावर ठेवले जाते. परिणामी मार्ग अरुंद होऊन वाहतूक कोंडी तर होतेच, परंतु मोठ्या वाहनांना वळसा घेणे कठीण बनले असून अपघातांची मालिकाच सुरु झाली आहे. आजचा अपघातही अशाच परिस्थितीत घडला असल्याने अतिक्रमणाचा मुद्दा पुन्हा ऐरणीवर आला आहे. मालवाहू ट्रक रिव्हर्स घेत असताना जागा कमी असल्याने दुचाकीवरून जाणाऱ्या बांबोळे यांना तो अचानक दिसला आणि त्यांनी दुचाकीचे ब्रेक दाबताच वाहन स्लिप झाले. त्या रस्त्यावर कोसळताच गंभीर दुखापत झाली.
अपघातानंतर परिसरात मोठी गर्दी जमली तसेच काही काळ वाहतूक खोळंबा निर्माण झाला. स्थानिक नागरिकांनी अतिक्रमण, पार्किंग व्यवस्था नसणे आणि वाहतूक नियंत्रण न होणे याबाबत प्रशासनाविरोधात संताप व्यक्त केला. ‘कोणीही ऐकत नाही, रोज सकाळी हा मार्ग धोकादायक बनतोय,’ अशी नागरिकांची ओरड ऐकू येत होती.
संबंधित ट्रक चालकास अटक करण्यात आली असून पोलीस तपास सुरु आहे. दरम्यान, पोलिस व स्थानिक प्रशासनाकडून वेगमर्यादा, वाहतूक नियमांचे पालन व मुख्य मार्गावरील अतिक्रमणावर तातडीने कारवाई करण्याचे आवाहन करण्यात येत आहे.
