लॉयड्स इनफिनाईट फाउंडेशनच्या CLG अनुदान सोहळ्याने १४७ विद्यार्थ्यांच्या स्वप्नांना दिली भरारी…
घुग्घुस, महाराष्ट्र: शैक्षणिक आणि सामाजिक बांधिलकीचे उत्कृष्ट उदाहरण देत, लॉयड्स इनफिनाईट फाउंडेशनने आयोजित केलेला CLG अनुदान पुरस्कार सोहळा नुकताच १२ जुलै, २०२५ रोजी जी.डी. गोएंका लॉयड्स पब्लिक स्कूल, म्हातरदेवी येथे मोठ्या उत्साहात संपन्न झाला.
या सोहळ्यात गरजू पण गुणवंत अशा १४७ विद्यार्थ्यांना CLG अनुदान प्रमाणपत्रे प्रदान करण्यात आली, ज्यामुळे त्यांच्या उच्च शिक्षणाचा मार्ग अधिक सुकर झाला आहे.
कार्यक्रमाला विविध मान्यवरांची उपस्थिती होती, ज्यात लॉयड्स मेटल्स अँड एनर्जी लिमिटेडचे युनिट हेड वाय.जी.एस.प्रसाद,वरीष्ठ उपाध्यक्ष प्रशांत पुरी,पवन मेश्राम, गुणाकार शर्मा आणि कौशिक घोष यांचा समावेश होता. या सोहळ्याचे प्रमुख मार्गदर्शक म्हणून जिल्हा परिषद चंद्रपूरचे अतिरिक्त मुख्य कार्यकारी अधिकारी श्री.गिरीश धायगुडे उपस्थित होते.
त्यांनी विद्यार्थ्यांना मार्गदर्शन करताना सांगितले की, “यश मिळवण्यासाठी कोणताही शॉर्टकट नाही, केवळ प्रामाणिक प्रयत्न आणि समर्पणच तुम्हाला तुमच्या स्वप्नांपर्यंत पोहोचवू शकते.” त्यांनी स्वतःच्या जीवनातील अनुभवांची उदाहरणे देत विद्यार्थ्यांना कठोर परिश्रम आणि ध्येयनिष्ठतेचे महत्त्व पटवून दिले.
लॉयड्स इनफिनाईट फाउंडेशनच्या सहाय्यक महाव्यवस्थापक विद्या पाल यांनी आपल्या प्रास्ताविक भाषणात फाउंडेशनच्या कार्याबद्दल आणि CLG अनुदानाच्या उद्दिष्टांबद्दल सविस्तर माहिती दिली. त्यांनी सांगितले की, या अनुदानाची निवड प्रक्रिया पूर्णपणे पारदर्शक आहे, जेणेकरून गरजू आणि खऱ्या अर्थाने पात्र विद्यार्थ्यांनाच याचा लाभ मिळेल. या वर्षीच्या अनुदानात जिल्ह्यामधील पहिल्या पाच विद्यार्थ्यांना परदेशी शिक्षणासाठी अर्थसहाय्य दिले जाणार असून, कंपनी परिसरातील ११ गावातील हुशार विद्यार्थ्यांना लॅपटॉप आणि पदवी शिक्षणासाठी आर्थिक मदत दिली जाईल. पुढील वर्षीही विद्यार्थ्यांनी मोठ्या संख्येने सहभागी व्हावे, असे आवाहन त्यांनी केले.
या महत्त्वपूर्ण सोहळ्याला विद्यार्थी, त्यांचे पालक,विविध शाळांचे मुख्याध्यापक, शिक्षक,स्थानिक सरकारी अधिकारी, सरपंच आणि पुढील वर्षी बारावीत असलेले विद्यार्थी मोठ्या संख्येने उपस्थित होते. संपूर्ण सभागृहात सकारात्मकतेचे वातावरण होते. हा कार्यक्रम केवळ पुरस्कार वितरण सोहळा नसून,तो शैक्षणिक उत्कृष्टता, युवा सक्षमीकरण आणि सामुदायिक भागीदारीचा एक अनोखा संगम होता.
कार्यक्रमाच्या शेवटी लॉयड्स इनफिनाईट फाउंडेशनचे दीपक साळवे यांनी उपस्थित सर्व मान्यवर, पालक आणि विद्यार्थ्यांचे आभार मानले. त्या अनुदान सोहळ्याचे सर्वत्र कौतुक होत आहे.
