काळीमा फासणारी घटना भावानेच केला महिलेवर बलात्कार
जोधपूर: महिलांवरील अत्याचाराच्या घटना राज्यात दिवसेंदिवस वाढतच चालल्या आहेत. दुसरीकडे नात्याला काळिमा फासणाऱ्या घटनाही उघडकीस येत आहेत. जोधपूरच्या सरदारपुरा परिसरातही अशीच एक धक्कादायक घटना घडली आहे. येथील एका महिलेवर तिच्या मानलेल्या भावानेच बलात्कार केला. इतकेच नाही तर, ब्लॅकमेल करून त्याने आणि मित्रानेही तिच्यावर सामूहिक बलात्कार केला.
मिळालेल्या माहितीनुसार, आरोपींनी महिलेकडील महत्वाची कागदपत्रे आणि धनादेशही घेतले आहेत. पीडितेने अखेर पोलिसांत धाव घेतली. तिचा जबाब नोंदवून घेण्यात आला आहे. या प्रकरणी सरदारपुरा पोलीस ठाण्यात सामूहिक बलात्काराचा गुन्हा दाखल करण्यात आला आहे.
पोलिसांच्या माहितीनुसार, पीडित महिलेचे लग्न झालेले आहे. तिने एका व्यक्तीला भाऊ मानलेले आहे. त्याने काही दिवसांपूर्वी बलात्कार केला. त्यानंतर काही दिवसांनी पुन्हा त्याने आणि त्याच्या मित्राने सामूहिक बलात्कार केला. दोघांनीही तिच्याकडील महत्वाची कागदपत्रे जबरदस्तीने काढून घेतली आहेत. तसेच ब्लॅकमेल करून धनादेश घेतले आहेत. कोऱ्या कागदावर सह्याही घेतल्या आहेत. या प्रकरणी पोलिसांनी आरोपींविरोधात गुन्हा दाखल केला आहे. या घटनेचा तपास केला जात आहे.
