पदवीधरांसाठी भद्रावतीत 29 ला रोजगार मेळावा
गोविंदराव वंजारी फाऊंडेशनचे आयोजन
40 कंपन्यांचा सहभाग
10 हजारांवर बेरोजगार सहभागी होण्याची शक्यता
भद्रावती (चंद्रपूर) : कोळसा आणि सीमेंट उत्पादन, ऊर्जा निर्मिती यासाठी ख्यातीप्राप्त असलेल्या चंद्रपूर जिल्ह्यातील पदवीधर बेरोजगारांसाठी गोविंदराव वंजारी फाऊंडेशनच्या वतीने 29 मार्चला सकाळी 10 ते 6 या वेळेत येथील भद्रावती येथील चंद्रपूर-नागपूर महामार्गावरील अली पेट्रोल पंपजवळील स्वागत सेलिब्रेशन येथे भव्य रोजगार मेळाव्याचे आयोजन करण्यात आले आहे. या मेळाव्यात महाराष्ट्रातील नामांकित कंपन्यांचा सहभाग राहणार असून चंद्रपूर जिल्ह्यातील सुमारे 10 हजारांवर बेरोजगार पदवीधर यामध्ये सहभागी होणार असल्याची शक्यता आहे.
नागपूर विभाग पदवीधर मतदारसंघाचे आमदार ॲड. अभिजित वंजारी यांच्या पुढाकारातून होत असलेल्या या मेळाव्यात मोठ्या प्रमाणात रोजगाराच्या संधी उपलब्ध होणार आहेत. सदर मेळाव्यात निर्मिती, आय.टी. ऊर्जा, ऑटोमोबाईल, बँकिंग क्षेत्रातील राज्यभरातील सुमारे 40 नामांकित कंपन्यांचा सहभाग राहणार आहे. पदवी शिक्षण घेत असलेले आणि पदवीधर या मेळाव्यात सहभागी होऊ शकतात. उमेदवारांचे शिक्षण ज्या क्षेत्रातील आहे, त्या क्षेत्राशी संबंधित कंपनी उमेदवारांच्या मुलाखती घेतील. थेट मुलाखतीच्या माध्यमातून त्याच ठिकाणी उमेदवारांची निवड करून त्यांना नियुक्ती पत्र प्रदान करण्यात येणार आहे.
सदर रोजगार मेळाव्यात चंद्रपूर जिल्ह्यातील प्रत्येक तालुक्यातील पदवीधर बेरोजगार सहभागी होऊ शकतील. तत्पूर्वी त्यांना ऑनलाईन नोंदणी करावी लागेल. abhijitwanjari.com या वेबसाईटवर जाऊन ही नोंदणी करता येईल. ऑनलाईन नोंदणी सुरू असून आतापर्यत भद्रावती येथील रोजगार मेळाव्यासाठी चंद्रपूर जिल्ह्यातील सुमारे तीन हजारांवर पदवीधर बेरोजगार आणि पदवी शिक्षण घेणाऱ्या विद्यार्थ्यांनी नोंदणी केलेली आहे. नोंदणी झालेल्या उमेदवारांनी 29 मार्च रोजी नियोजित ठिकाणी शैक्षणिक पात्रतेचे सर्व कागदपत्रे घेऊन उपस्थित राहणे बंधनकारक आहे. संबंधित उमेदवारांच्या शैक्षणिक पात्रतेनुसार संबंधित कंपनीना देण्यात आलेल्या क्रमांकाचे टोकण उमेदवारांना देण्यात येईल. त्यानुसार, संबंधित क्रमांकाच्या दालनात त्यांची मुलाखत होईल. निवड झालेल्या उमेदवारांना मेळाव्यातच नियुक्तीपत्र देण्यात येईल.
गोविंदराव वंजारी फाऊंडेशन आयोजित पदवीधर रोजगार मेळाव्याचे उद्‌घाटन सकाळी 10 वाजता आ. अभिजित वंजारी, जिल्ह्यातील अधिकारी आणि मान्यवरांच्या उपस्थितीत होईल. यावेळी रोजगाराच्या आणि स्वयंरोजगाराच्या दृष्टीने विविध क्षेत्रातील मान्यवरांचे मार्गदर्शन लाभणार आहे. मेळाव्याच्या ठिकाणी विद्यार्थी आणि पालकांसाठी अभ्यागत कक्ष, नोंदणी कक्ष, माहिती कक्ष उभारण्यात येणार आहे. मेळाव्यात येणाऱ्या युवकांना योग्य मार्गदर्शन करण्याच्या दृष्टीने स्वयंसेवकांची नियुक्ती करण्यात येणार आहे. मेळावा आयोजनाची तयारी अंतिम टप्प्यात आहे. या मेळाव्यात जास्तीत जास्त पदवीधर बेरोजगारांनी सहभागी होऊन संधीचा लाभ घ्यावा, असे आवाहन नागपूर विभाग पदवीधर मतदारसंघाचे आमदार ॲड. अभिजित वंजारी यांनी केले आहे.
